大象國發惡踩扁北韓

港陌

25/06/2010
文： 亨格比利

希望愈大，失望愈大！以捧走世盃冠軍為目標嘅北韓上仗慘遭葡萄牙蹂躪，令一班自視過高嘅國腳陷入信心危機。G組最後一輪分組賽今晚爆發，仲未放棄出線嘅「大象國」科特迪瓦除咗望葡萄牙喺另邊廂輸波之外，自己亦要做好本分大炒北韓一鑊，「讓球客勝」值博。（有線63及中央7台周五晚10:00直播）


科特迪瓦頭兩場分組賽錄1和1負，出線機會相當渺茫，一來要望巴西贏波，二來要大炒北韓追番同葡萄牙之間嘅得失球差。雖然任務艱巨，不過守將班巴、中場耶耶托尼同隊長杜奧巴賽前都表示未放棄，仲話就算出局都要對得住「大象國」球迷，預期今晚實發動狂轟猛炸搵北韓祭旗。

鄭大世陷信心危機

北韓上仗勁吞葡萄牙7蛋，霎時間由最神秘球隊變成最可憐球隊，安英學賽後表示「冇諗過輸得咁慘」，守將李光川直情請北韓記者食檸檬拒絕受訪，就連自信心爆棚嘅鄭大世都喊晒口話辜負咗祖國球迷，對科特迪瓦賽前亦冇再發表入波宣言，自信心明顯大受打擊。

防線混亂體能輸蝕

查實北韓頭兩場分組賽表現爭咁遠，好大程度係由於對巴西場波守得好，個個心雄唔識死走去同葡萄牙鬥攻，南韓同日本媒體異口同聲指北韓大賽經驗不足、體力不繼同後防混亂係導致大敗嘅主因。要知道科特迪瓦戰將個個體格魁梧兼爛打，分組賽首戰更加搞到葡萄牙冇啖好食，篤定出局嘅北韓戰意成疑，今鋪輸多鑊勁畀科特迪瓦唔出奇。

非常論戰

波卡‧科特迪瓦後衞


「我相信有奇迹，就算出線機會渺茫，科特迪瓦都會全力爭勝，即使出局都可以抬起頭行出球場。」

鄭大世‧北韓前鋒

「世界盃仲未結束，今場一定要贏科特迪瓦，報答祖國人民對北韓嘅支持！」

孭非球星

杜奧巴（科特迪瓦前鋒）永不言敗

就算狀態未夠100%，杜奧巴依然係「大象國」嘅靈魂人物，上仗就搞到巴西中堅祖安勁狼狽，最後頭槌破蛋為科特迪瓦挽回面子。爭勝欲同鬥心不嬲強嘅杜奧巴，今晚實起勢喪衝擊北韓防線，為爭出線作最後努力。

車正革（北韓後衞）能攻擅守

北韓上仗雖然慘敗，不過右閘車正革就獲外國傳媒高度評價。助攻力強嘅車正革射門欲強，加上攔截功夫到家，簡直係北韓嘅防線之星，今晚北韓預期捱打，睇嚟又係車正革「騷哥利」嘅時候。

睇非搵食：科特迪瓦「客勝」高半線

北韓已提前「畢業」，科特迪瓦亦都半隻腳離開咗南非，今場波絕對係例行公事，所以早飛得嗰80幾萬。初步睇，北韓W個水位兩度下調都彈返上去，科特迪瓦始終略高半線，小注要讓球客勝啦！

首球推介

科特迪瓦仲有些微機會爭出線，戰意肯定凌駕北韓之上，首球熱選杜奧巴。「魔獸」雖然未回復最佳狀態，但上仗頭槌頂破巴西大門盡顯功架，有沙洛文卡勞同謝雲奴做側擊肯定大把供應。右翼伊保爾遠射有一手，次選博得過。

小虎鱼