巴西引擎壞機啃唔落葡萄牙

港陌

25/06/2010

世盃G組今晚上演分組賽最強戲碼，由葡萄牙硬撼巴西。上仗以7球痛宰北韓嘅葡萄牙軍心大振，為爭首名出線，避免喺16強對H組首名，今仗鬥志不必懷疑。考慮到巴西有卡卡同艾蘭奴一對正選進攻中場缺陣，要贏唔易，捧葡萄牙1.7倍「讓球主勝」啱數。（有線61及64、廣東體育及中央5台周五晚10:00直播）


巴西由分組賽至今表現穩定，惟卻有種慢熱嘅感覺，今仗面對信心爆棚嘅葡萄牙絕對係一個好大嘅考驗！球隊話唔定好快會畀葡萄牙控制住比賽節奏，加上巴西後防有時亦出現唔集中嘅情況，好似對北韓一仗嘅失球就係一個好好嘅例子。中場艾蘭奴受傷同卡卡停賽，領隊鄧加將會改派丹尼爾同巴迪斯達頂上，球隊中場中路缺乏創造性球員，更難攻破對手。

葡萄牙變陣更有隊形

葡萄牙上仗喺正選陣容上作出4個調動，打起上嚟更有隊形，其中右閘棄用近年缺態嘅保羅費拉拿，改以米基爾蒙迪路擔任正選，令右路攻守都有所增強。中路方面，以堤亞高文迪斯頂替迪高，中場活力有所提升，自然有利球隊嘅433陣式發揮，加上前線改以曉高艾美達作箭頭，由佢配合翼鋒沙保沙同C 朗拿度，威力明顯較由列特臣任柱躉箭頭時更強。


當然，不得不提係隊長C 朗拿度今屆表現愈見全面，爭取入波之餘亦做好助攻，上仗呢位大哥已經打破入球荒，由佢領軍，今仗對巴西坐和望贏。

非常論戰

堤亞高文迪斯‧葡萄牙中場


「巴西係實力好強嘅球隊，但我哋唯一目標，就係擊敗佢哋，然後以首名出線，跟住再睇吓點部署。最後1場分組賽，命運掌握喺我哋手中，我哋一定會以爭勝嘅心態迎戰。」

盧斯奧‧巴西中堅

「我哋永遠都希望有進步，同埋防止再犯錯，當然，連續失波令我哋好唔滿意，因為冇人希望失波，賽後我哋習慣會作出檢討，無論如何，面對葡萄牙我哋唔可以再有失誤。」

孭非球星

曉高艾美達．高大中鋒

身高1米91嘅高大中鋒，腳法雖然唔算超佳，不過勝在夠大件，可以衝散對手後防等隊友數胡，又可以做頭槌二傳，或者直接轟炸借助高空優勢入波。

盧斯奧．攔截耍家

世界有名嘅「出擊中堅」，最鍾意後上參與進攻，但自從加盟國米，經莫連奴改造後輕出次數明顯減少，加上佢攔截同頭槌唔曳，普通前鋒好難過到佢嗰關。

睇非搵食

葡萄牙上場發狂炒咗北韓7粒，加埋巴西今場踢少件卡卡，造成外界憧憬葡萄牙偷到雞，佢哋個主W一直向低走，但係480幾萬早飛入面，只得10分1買葡萄牙，而且巴西個水位下壓力大，就係得和波上升，咁嘅環境博入球大合理啲。

首球推介

由於卡卡停賽，羅賓奴控球在腳嘅機會肯定大增，佢腳法好唔在講，埋門把握力都高，「首球」有6倍抵玩。如果要揀葡萄牙球員入波，魯爾梅利斯上場對北韓不斷遠射，次選要預佢。

小虎鱼