鹽湖城主場殺聲震天

港陌

25/06/2010
文： Mic少

當大家睇緊世界盃嘅時候，記得留意美職明早重開，上演皇家鹽湖城主場對聖荷西地震嘅獨腳戲。鹽湖城係今季主場王，聯賽主場勝出率高達八成三，今場要贏聖荷西地震冇難度，主勝穩陣。


（周六早上９時開賽）


皇家鹽湖城係上季主場成績最佳球隊，今季依然保持光榮傳統，主場六戰取得五勝一和。因為球隊主場位處海拔四千四百多尺，高原氣候令對手難以適應，上輪聯賽更喺主場擊敗洛杉磯銀河，打破對手今季不敗之身，可想而知要作客喺鹽湖城身上取得分數極之困難。加上鹽湖城隊長碧卡文已經傷愈，即使前鋒芬特尼獲國家隊徵召缺陣，實力依然高一籌。

聖荷西地震未夠班

聖荷西地震今季表現雖有進步，但實力始終未入流，尤其係近一個月嘅三場聯賽只得一和二負，包括輸畀另一支弱隊ＦＣ達拉斯。而且地震太依賴前鋒雲度路斯基入球，易被對手防範，作客勝算更加低。


對賽方面，鹽湖城已於今季首循環作客大勝地震三比○，而近四次主場對地震，亦取得兩勝兩和，完全食住地震，相信可以順利再贏地震。

小虎鱼