科特迪瓦大騷送一程

港陌

25/06/2010
文： 麥馬拿仁

世盃「死亡Ｇ組」最後一輪，科特迪瓦撲擊北韓。北韓連敗已告畢業，而科軍出線機會亦微，雙方冇包袱下會放開懷抱進攻。科軍有杜奧巴壓陣，上仗都有波入，力足撕破北韓防線；北韓頭兩仗都放膽進攻，今仗唔會縮，開大好路。（有線63台周五晚10時直播）


經過兩輪賽事，「死亡Ｇ組」形勢已經明朗化，巴西兩戰兩勝篤定出線，葡萄牙四分緊隨其後，科特迪瓦得一分，而北韓零分已經冇機會出線。因為葡軍上仗大數北韓七比○，目前得失球為正七球，而科軍得失球為負二球，即係葡軍領先科軍九個得失球，所以今仗避免大敗予巴西，就極有機會晉級。

杜奧巴返晒嚟

科特迪瓦就算好似葡軍咁叻仔贏北韓七粒，都要葡軍淨負兩粒先奇迹出線，所以科軍基本上已八成出局。


雖然如此，但科特迪瓦係本屆世盃表現較好嘅非洲球隊，行軍快速侵略性強，而且杜奧巴亦已完全康復，上仗射破巴西大門，再配合沙洛文卡勞等出色鋒將，要入波唔難。始終科軍數字上仍未死得晒，所以肯定一開波就攻，如果可於比賽早段入波，或者又係一場大屠殺。


北韓上仗同葡萄牙搶攻，最後狂吞七蛋，但整體演出唔算太曳，於開波初段更曾取得數次埋門。北韓呢班波好有尊嚴，雖然身處死亡之組，但對巴西同葡萄牙都冇打守勢波，依家已經出局更加冇必要龜縮，當然佢哋都唔想再次大敗，但北韓基本上係支攻擊球隊，目前冇晒心理包袱，呢場畢業「攻」演肯定盡情鬥轟，今戰吼大好路。