瑞士熱W起筷

港陌

25/06/2010
文： 蘇豪

世盃Ｈ組最後一輪分組賽，瑞士於布隆方丹對洪都拉斯，洪都拉斯世界排名唔低，但踢落完全冇料到，前線鋒力極弱，現時出線機會名存實亡，就算有心搶分挽回面子，蘇豪相信洪軍亦無力反抗，瑞士可贏波晉級，1.45倍熱Ｗ照捧！ （有線63台周六凌晨２時30分直播）


洪都拉斯世界排名三十八，踢落似一百零八，睇完兩場分組賽，班球員波底的確唔錯，但衰在掛住玩波，一味搓搓搓，攻勢唔夠入肉，頭兩戰合共起腳十六次，當中得兩次中龍，上仗對西班牙九射零中，完全唔知做緊乜。洪都拉斯數字上仲有機會出線，但要自己贏幾粒，再望西班牙輸波，難過登天。

洪軍近7仗6場食白果

要贏波必先有士哥，可惜洪都拉斯球員近期已不知士哥為何物，大軍熱身賽連決賽周七戰不勝，當中六場冇入波，火力弱得可憐。洪都拉斯前線靠晒蘇亞素搵食，但此子最近因傷狀態極曳，於前線行行企企，完全冇腳好波，連王牌射手都踢成咁，其他球員更加不值一提，踢波唔掂，又冇鬥心，咁就想搶分？


瑞士目標明確，今場要全取三分，同時盡量爭取士哥，咁至可以取得出線資格。瑞士守將辛德路斯受傷缺陣，此子因怒剷隊友整親，唔在陣更佳。另外，中場比哈美要坐波監，可由巴尼達頂上，影響唔大。球隊想贏最好唔出敗家仔戴迪約克，搵尼古科拍阿歷山大費爾，三分可手到拿來。