西班牙爭出線話晒事

港陌

25/06/2010
文： 法比加輝

世界盃分組賽最後一個賽日，H組西班牙大戰智利，雖然智利手執六分，但老實講出線形勢未許樂觀，皆因今場要面對實力雄厚嘅西班牙，料非常惡踢，最弊係兩大主力馬迪亞斯費南迪斯同卡路士卡莫拿停賽，實力難免大為削弱。西班牙要搏贏出線，加輝信佢哋做得到，若嫌齋Ｗ分頭欠佳，可博「讓球客勝」。 （有線61台周六凌晨2時30分直播）

形勢險峻唔再玩嘢

Ｈ組出線形勢混亂，智利有六分喺手，只要今場踢和西班牙就肯定獲得出線資格，不過輸波亦未必唔得，只要瑞士失分亦出到線，不過若然瑞士贏波，屆時就會出現三隊同得六分情況，就要計得失球計餐飽。由於瑞士贏洪都拉斯機會樂觀，間接令西班牙「非勝不可」，呢班高質球星冇得揸流攤下，自然更信得過。


西班牙賽前有兩大利好消息，首先係恩尼斯達已經傷愈復操，今場可以候命，不過加輝認為捷西斯拿華斯上場表現不俗，雖然出波冇準，但其靈活快速走位可輕易扯開對手防線，故不變應萬變更佳，始終恩尼斯達季尾開始頻頻受傷，狀態只屬一般，倒不如作後備殺手好過。

智利攻守命脈停賽

西班牙另一個優勢，就係對手智利有兩大主力馬迪亞斯費南迪斯同卡路士卡莫拿停賽，兩人分別係智利攻守命脈，同時缺陣難免令中場組織力及攔截力大為削弱，預計智利今場難以好似前兩場咁，踢出悅目進攻足球。


基於西班牙唔單只要贏波爭出線，球隊更希望盡量入球確保首名資格，避開好大機會攞到Ｇ組首名嘅巴西，所以西班牙一定唔會小勝收手，今場趁智利人腳唔齊盡數，「讓球客勝」超過２倍值得追捧。

H組出線條件

賽果 出線隊伍

智勝、瑞勝或和 智首名、瑞次名

智勝、洪勝 智首名；西、瑞及洪計得失球

智西和、瑞勝 智首名、瑞次名

智西和、瑞和或負 智首名、西次名

西勝、瑞勝 西；智及瑞計得失球

西勝、瑞和或負 西首名、智次名

註：智（智利）、西（西班牙）、瑞（瑞士）、洪（洪都拉斯）