澳洲臨別好輕鬆讓球主勝抵玩

港陌

23/06/2010
文： 走肖

「澳大利亞歡送派對」約埋你！澳洲今晚喺世盃D組對塞爾維亞，出線形勢凍過水，理論上踢埋呢場就要同南非講拜拜，賽前有消息話，佢哋已搵定喀麥隆教頭拿古恩做新主帥，代替被球員喪插嘅韋比克領軍，好可能振奮澳洲軍心，「讓球主勝」抵博！（有線63及中央1台周四凌晨2:30直播）


現時澳洲兩戰得1分喺D組包尾，想出線今場一定要贏，同時望加納打沉德國，除咗咁，其他出線可能性其實好微，有理由相信佢哋喺冇包袱下踢場爭氣波，特別係今場有「頭槌王」卡希爾坐完波監復出，佢喺對德國時，因為球證執法過嚴被逐，呢場復出肯定搏盡。

冇料領隊落台振軍心

澳洲雖有基維爾同奇治摩亞停賽，防中格拿因傷缺陣，但澳洲打開整體戰，唔會因為個別球員受傷而崩潰。更何況，曾被落選嘅FC北京射手祖爾格菲斯炮轟，最近又同巴勒莫翼鋒比斯安奴互鬧嘅韋比克終要落台，據聞澳洲足總加碼斟介拿古恩執教，球員聽見實開心。


今屆決賽周，印證教頭好壞對勝負嘅影響力，好似杜明歷搞到法國冧檔，希斯菲特幫瑞士打沉西班牙，相信澳洲球員聽見新教頭即將上任，心情會靚好多，通常人被逼到絕境就會爆發潛力，依家澳洲正係面對呢種環境，配合佢哋近5場世盃分組賽有1勝2和2負衰唔晒，博得過！

塞軍主攻冇着數

至於塞爾維亞呢場贏到固然肯定出線，但和嘅話就有可能出局，形勢上需要主攻，未必有着數。最奇怪係，最近不斷傳出有關塞爾維亞球員嘅轉會消息，施積、卡錫、蘇蘭托錫、蘇保迪、尼曼查維迪當正參加世盃係見工大會咁，難怪近期對住新西蘭、波蘭同加納都W唔出，唔抵撐！

非常論戰

尼爾‧澳洲後衞

「球迷唔應該放棄，因為我們仲未放棄。我希望德國對加納，能夠踢出對我哋嘅水準，製造好多機會、拎到大量入球，盡量將我哋同加納嘅得失球差，減到最少，咁樣我們贏塞爾維亞嘅話，就有機會出線。」

米蘭祖雲奴域‧塞爾維亞中場

「贏德國嘅比賽，我哋嘅傳送有進步，但仲未足夠，當時我哋打多1個都唔能夠創造空位進攻，好彩最後冇因為咁被懲罰。今場我哋要好小心至得，同時避免失波，因為澳洲係好有質素嘅球隊。」

睇非搵食

澳洲水位高博塞軍W

澳洲理論上仲未出局，擊敗塞爾維亞係佢哋嘅唯一生機，不過早飛嘅投注者似乎唔多信有奇迹，買澳洲W嗰18萬注碼，應該係貪佢好分啫，於是水位持續向高位走，都係博有140萬銀碼支持嘅塞爾維亞W。

(子貝)非球星

卡希爾（澳洲中場）頭槌了得

04 年加盟愛華頓嘅卡希爾，身高得1米78，但佢憑住驚人彈跳力同準確入楔時間，就算喺充斥高大中堅嘅英超，都經常能夠借助死球、傳中用頭槌入波，被稱英超頭槌王，頭場佢畀球證趕出場，非常唔忿氣，呢場必定會用全力衝擊對方後防。

尼曼查維迪（塞爾維亞中堅）制空力強

由於澳洲球員出名體力化，最好技術嘅基維爾又停賽，効力曼聯嘅塞爾維亞中堅尼曼查維迪，對住澳洲大把機會發揮。雖然尼曼查維迪上場對德國無厘頭犯手球輸12碼，但佢制空力強又夠晒大件，曾經為曼聯贏過3次英超錦標，簡直係空中霸王。

澳洲後備

3 奇治摩亞

9 約舒亞堅尼地

10 基維爾

12 費達歷斯

13 格拿

15 積甸拿克

17 路卡維斯亞

19 李察加西亞

18 巴利鍾斯

20 米利根

21 戴夫卡尼

22 維度錫

塞爾維亞後備

2 魯卡維拿

4 哥高加卡

7 蘇蘭托錫

8 拿索域

11 米利查斯

12 伊沙奴域

13 盧高域

16 艾雲奧巴杜域

18 連高域

19 拉度沙夫柏度域

21 美迪查

23 杜歷錫

上場數據

射門：8射5中

角球：1次

傳送：476次

傳送成功：340次

犯規：18次

被侵犯：20次

黃牌：1張

紅牌：1張

上場數據

射門：9射3中

角球：1次

傳送：448次

傳送成功：328次

犯規：10次

被侵犯：20次

黃牌：4張

紅牌：0張

近5次對歐洲球隊不勝

‧對上5次在世盃決賽周遇上歐洲球隊，得1和4 負。

‧74年及06年世盃決賽周，最後1場分組賽皆以和局收場。

連續兩場分組賽被罰12碼

‧ 計埋06年以塞爾維亞及黑山名義出戰，近5場世盃分組賽得1勝4負。

‧今屆連續2場分組賽被球證吹罰12碼。

首球推介

基維爾停賽，預計坐完波監嘅卡希爾會再串演前鋒，不過佢肯定會成為塞爾維亞重點看管目標，要入波唔容易，反而擅長打反擊嘅比斯安奴仲易開「首球」。同樣道理，卡錫係塞爾維亞陣中最扭得，次選一於揀佢。