神鋒格劍鬥數胡 羅馬大盤冇甩拖

猪拉多纳

今晚意甲焦點之戰，必屬羅馬主場對拖連奴！事關雙方射手迪斯高、比洛迪今季大勇狂數胡，迪斯高上周中歐霸盃更加上演帽子戲法，助羅馬大炒維拉利爾4蛋，腳風順到不得了。至於比洛迪要為意大利土炮前鋒爭一口氣，有力繼首循環之後，再次攻入羅馬大門，中位數2.5/3球照捧入球大。（TVB 302周一凌晨1時直播）

迪斯高今季大翻身，聯賽已轟入18球，比上季全季仲多10球，重拾巔峰時期水準。呢位波斯尼亞國腳上仗歐霸盃獨取3球後，以8球高踞賽事射手榜一哥，雙線作戰都難唔到佢。
迪斯高戴完帽信心爆棚

迪斯高仲好招積咁話，對於不斷入波，並唔感意外，因為現時先至係真正嘅自己，可見佢信心爆棚。迪斯高可以保持高入球量，都要多得羅馬主攻戰術支持，11場聯賽主場全勝之餘，更喪入32球，換言之平均1場入近3球，今仗主場當然唔赦拖連奴。

另一邊廂，拖連奴雖然成績稍遜，但射手比洛迪表現不在迪斯高之下，呢位23歲意大利新進國腳喺聯賽亦有17球進帳。現時意甲射手榜前列球員希古恩、迪斯高、梅頓斯、莫路伊卡迪都係外援，比洛迪被視為意國土炮新希望，今仗遇勁敵迪斯高，唔止為球會搶分，更要為國爭光。比洛迪首循環入波兼助攻，幫拖連奴以3比1擊敗羅馬，今仗等佢再騷哥利嘞！