射手打柴馬賽好易畀雷劈

猪拉多纳

法國國腳皮耶上月尾由韋斯咸回流馬賽，理應可以提升呢支法甲老牌球隊實力，可惜天意弄人，首席射手巴菲迪比高美斯上仗膝部韌帶受傷，需要抖4至6星期，對球隊造成沉重打擊。馬賽今季聯賽33個入球，有16球由巴菲迪比高美斯射入，佢缺陣之下，馬賽攻力大打折扣，今仗主場讓唔起雷恩，讓球客勝可作過關重心。

（TVB 303及Now 714周日凌晨零時直播）

巴菲迪比高美斯3年前由里昂轉投英超史雲斯，但表現一直冇料到，今季被外借去馬賽，踢番熟悉嘅法甲，立即重生，上仗聯賽對南特，個人梅開二度，但卻勇戰受傷，球隊亦以2比3敗陣，受雙重打擊。馬賽突然失去進攻重心，加上皮耶回巢冇幾耐，一時難以支撐大局，今仗情況唔樂觀。雷恩近7場聯賽未贏過，但其實只係輸過畀勁旅巴黎聖日耳門0比1，因為另外6場都打和，踢法好硬淨。況且馬賽缺少巴菲迪比高美斯，更加咬唔入雷恩，客軍受讓抵玩。
意甲阿特蘭大穩食魚腩

意甲方面，阿特蘭大依家仲可以排第5位，令人驚喜，皆因佢哋主場成績非常出色，近9次主場出擊，贏咗8次，包括擊敗拿玻里、國際米蘭、羅馬，今仗主場對魚腩克羅托內，有力大勝。

（TVB 302周日凌晨1時直播）

另一場意甲，護級分子安玻里主場搶分力強，近4場聯賽主場取得3勝1和，今仗喺地頭對拉素，仲有得受讓，捧讓球主勝。

（TVB 302周日凌晨3時45分直播）