獅吼讓唔起鳳凰

猪拉多纳

占美仔扭計累全家

今季最多人講嘅澳職球員，肯定有布里斯班獅吼前鋒占美麥卡倫份。之不過講親呢位澳洲超新星都係負面居多，佢最近重因為同球會傾續約拉鋸，搞到狀態大跌，上場更加被踢出正選名單添！獅吼亦因為咁，要付出戰績同樣直線插水嘅代價。今日佢哋對住士氣高昂嘅威靈頓鳳凰，作客仲要讓波梗係信唔過啦，反而捧讓球主勝最好路。

（有線64及203台周六下午2時35分直播）

布里斯班獅吼上場2比3輸畀墨爾本勝利，聯賽已經3連敗，王牌前鋒占美麥卡倫近期狀態勁唔掂，被指同佢扭計唔肯續約有關。終於連教練艾萊斯都頂唔順，上場對勝利將佢貶為後備。係就係意外啲，不過佢後備入替亦都無乜爭氣表現呢。今仗球隊仲有中場柏拉杜斯亦係處於續約僵局，表現低沉，睇嚟獅吼若要再發威，都要等多陣喇。
鳳凰出名「地頭蟲」

主場出擊嘅威靈頓鳳凰，周中送咗三蛋畀如日方中嘅墨爾本勝利，連埋之前1球小勝中岸水手，佢哋已經連續兩場贏波兼零失波。睇番球隊對上7場聯賽亦獲3勝3和，成績算唔錯。其實，鳳凰都屬於「地頭蟲」一類，佢哋一旦主場出擊，對手唔易贏出，因此，今場受讓真係筍到爆，真係冇乜幾可，讓球主勝要捧場喇！