科特迪瓦炸多哥立威

猪拉多纳

在加蓬舉行的非國盃C組今晚開戰，衞冕嘅科特迪瓦首戰鬥多哥，雖然科特迪瓦同2年前冠軍陣容面目全非，但前線有「新兵」韋費特沙夏領軍，後面又有曼聯新星艾歷拜利鎮守，卡士仍然高過青黃不接嘅多哥多多聲，「讓球盤」科特迪瓦讓半一絕對唔嫌多，上盤必撐。

（TVB 303周二凌晨零時直播）

相比上屆稱霸非洲，耶耶托尼同高路托尼已經唔在陣，前鋒主將謝雲奴亦因傷落選，不過科特迪瓦都有唔少猛人接班，效力水晶宮嘅韋費特沙夏決賽周前「入籍」，佢同韋菲特邦尼合組嘅「雙韋」攻擊線夠晒級數，球隊早前喺熱身賽擊敗瑞典兼大勝烏干達，狀態唔錯，今仗可望輕鬆贏波搶頭彩。
「失業」艾迪巴約頂硬上

對手多哥青黃不接，大部分球迷只係認識當年嘅「多哥王子」艾迪巴約。唔係講笑，呢位已經半年冇班落嘅32歲前鋒，今屆仍然係多哥主力射手兼隊長，更有趣嘅係，多哥38歲門將阿加沙同佢一樣都係「失業球員」，呢班雜牌軍只係非洲三線球隊，根本冇能力抗衡個個當打嘅科特迪瓦。

而較後時間上演嘅另一場C組賽事，剛果民主共和國對摩洛哥，剛軍王牌球星恩歷克波拿斯受傷未有參賽，影響甚大，面對來自北非嘅實力分子摩洛哥，齋計牌面都輸晒，摩洛哥Ｗ有分頭值博。

（TVB 303周二凌晨3時直播）