巴塞「畢」勝無歸

猪拉多纳

新一年頭炮遇私房菜

周五凌晨上演最後一場西班牙盃16強首回合，上屆冠軍巴塞隆拿作客「巴斯克雄獅」畢爾包，巴塞隆拿喺歇冬期重整旗鼓，密密同美斯及主帥安歷基等5名重臣斟介續約，希望可以穩定軍心，況且近年交手都食住畢爾包，今仗有望先拔頭籌，巴塞讓半一捧上盤。（周五凌晨４時15分開賽）

巴塞今季聯賽唔多順利，依家聯賽落後「1哥」皇馬3分兼打多1場，形勢不妙。「地上最強」上年夏天簽入安祖高美斯、柏高艾卡沙等新兵，大部分都貨不對辦，高層意識到當務之急先要留低一眾舊將，上年先同布斯基斯、蘇亞雷斯、尼馬等續約，今年亦計劃與美斯、恩尼斯達、達史特根、拿傑迪錫及主帥安歷基續約，藉此穩定軍心，為下半季急起直追做好準備。
畢爾包近5對賽輸晒

巴塞今輪西盃出戰「私房菜」畢爾包，正正係佢哋打響2017年頭炮嘅最佳良機。儘管畢爾包踢法硬淨，但雙方近5次交鋒，巴塞錄得全勝佳績，而且更合共轟入13球，若單計近4次喺西盃對碰，「地上最強」亦獲得全勝，明顯格食格，加上畢爾包有伊度拉斯比、迪馬高斯及艾基迪斯3位主力因傷倦勤，更難抵擋巴塞來襲，敲上盤冇衰。