米堡追打冇牙老虎

猪拉多纳

侯城搏到殘一篤即散

今晚英超獨腳戲上演護級大戰，由第16位嘅米杜士堡主場硬撼尾2「老虎」侯城。侯城雖然啱啱喺英聯盃殺入4強，但激戰至射埋12碼先贏波，耗力唔少，而且佢哋近4仗聯賽作客全敗，後防好似紙紮咁一篤即穿，米堡遇強都不落下風，今仗以逸待勞之下，對住呢隻「冇牙老虎」仲唔係搶分好時機，主勝有計。

(Now 621及LeSports HK應用程式周二凌晨4時直播)

侯城喺上周中英聯盃8強惡鬥紐卡素，法定時間前有箭頭馬保卡尼領紅牌被逐，打埋加時雙方打和1比1，最終「老虎」憑互射12碼贏波晉級，係就係開心，但打少個兼激戰120分鐘，體力消耗極大，未必咁快回到氣，況且佢哋傷兵滿營，艾保靴南迪斯、賴恩美臣及馬隆尼上陣成疑，而韋爾堅尼、基格盧亞、奧度巴祖及阿歷斯布魯士皆唔出得，搞到主帥費蘭頭都痕埋。最弊係侯城作客曳到冇朋友，單計近4仗聯賽客場輸晒之餘，仲狂失15粒，條防線猶如不設防，畀勁旅利物浦炒5比1還算情有可原，但連般尼茅夫都可以狂數佢哋六個一皮，實在非常肉酸。
尼格度重拾射門鞋

米堡雖然近5仗聯賽僅1勝，睇落狀態麻麻，但要留意，當中佢哋曾逼和李斯特城、阿仙奴及曼城，主場對「一哥」車路士只係僅輸1球，非常硬淨，證明佢哋出戰強隊亦不落下風。米堡箭頭尼格度上仗賽和李斯特城2比2之役亦梅開二度，呢位大舊中鋒重拾射門鞋，絕對係米堡一大喜訊，況且米堡近4次主場對侯城，錄得3勝1負明顯格食格，加上上周中冇波踢，今仗可以抖到夠，要贏體力輸蝕兼天殘地缺嘅「冇牙老虎」唔難，主勝不容錯過。