菲律賓藉地利 大鬥新加坡

猪拉多纳

首個賽日另一場A組賽事，菲律賓主場鬥新加坡，菲律賓過去3屆都係4強止步，今屆身為主辦國之一，當然希望趁有地利優勢，打破「梗頸四」宿命，不過新加坡貴為東南錦4屆冠軍，球員大戰經驗豐富，而且啱啱贏波終止頹勢，近年分組賽亦大踢進攻足球，今仗博入球大。

（Now 670及Fox Sport Play周六晚8時直播）

菲律賓近年積極發展足運，2年半前更聘請德國裔嘅美國名宿杜利執教，佢率領球隊打入上屆東南錦4強，僅被後來嘅冠軍泰國淘汰，雖敗不辱。菲律賓上月約戰實力高一班嘅北韓、巴林踢熱身賽，明顯想加強訓練力度，雖然都係輸波而回，但都可以拎到入球，今仗主場出擊肯定全力搶攻。
新加坡友賽贏波谷起士氣

至於新加坡雖然曾經4次捧東南錦冠軍，但上屆分組賽出局，新帥孫德蘭上任後球隊正進行磨合，經過連串熱身賽同多哈集訓營後，球隊表現已經有起色，東南錦舉行前最後一場熱身賽，就以1比0贏今屆另一支參賽球隊柬埔寨，為球隊注入強心針，新加坡近2屆分組賽6場波，有5仗總入球達3球或以上，今仗繼續追「大」。