萊比錫紅牛殺破狼

猪拉多纳

德甲新舊富豪今夜交接

今輪德甲壓軸戲，近期風頭躉「紅牛」RB萊比錫作客「狼堡」禾夫斯堡，萊比錫開季3勝3和位列第5，成為德甲史上首6輪成績最好同唯一不敗升班球隊，相反禾堡開鑼戰贏波後下滑，近5輪只得3分合共只入2球，狀態分野甚大。今仗亦係德甲新舊兩間富豪球會嘅交接大會，昔日富豪禾堡正式沒落，由如日中天嘅萊比錫接棒，禾堡仲要讓平半，黑柴梗係撐萊比錫下盤。

（有線61、64、201、203台、Now 670、FoxSportsPlay周日晚11時30分直播）
禾堡閂水喉猛將嗌走

禾堡一向得到大眾車廠鼎力支持，財大氣粗，2013年喺車路士買入奇雲迪布尼、兩年後再重金撬走史浩克王牌達斯拿，出手超爽。不過風水輪流轉，由於贊助商大幅縮減支持，球隊近兩年要節衣縮食，上季畀曼城挖走迪布尼，今季亦畀多蒙特撬走國腳舒賀爾尼，呢啲情況以前絕對唔會發生。睇番禾堡今夏喺轉會市場，買賣收支只係付出約300萬歐元（約2,550萬港元），已經由富豪變番平民。現時球隊財政同成績都差咗，陣中兩大球星達斯拿同黑柴眼中嘅世界級左閘列卡度洛迪古斯都不斷嗌走，據報兩人最快會喺一月轉會窗他投，禾堡前景將會更加暗淡。
萊比錫近季狂買新星

相反，萊比錫初升德甲即成為神奇球隊，但事實上佢哋準備已久，喺紅牛集團大力支持，加上有教授教頭蘭歷克擔任總監，近兩、三季喺德乙已不斷高價高薪買入大量優質年輕國腳級球員，分別來自德國甚至其他國家嘅U21、U19甚至U17同U15球員，為未來打好根基。RB萊比錫獲得升上德甲資格後，今夏仲豪花超過5,000萬歐元（約4.2億港元）擴軍，目前陣中26名一隊球員，有11位現役國腳同7位青年國腳，根本連後備都大有來頭，最難得係當中有12個係21歲或以下，前途無可限量，黑柴夠膽講，如果禾堡今仗主場都贏唔到，日後想贏萊比錫就會愈嚟愈難。

不過禾堡今仗想贏亦唔係咁易，佢哋除咗軍心不穩，近況亦沉，新加盟嘅箭頭馬里奧高美斯仲未攞到第一個入球，中場攻守兩大主力迪達維同古拿禾古又養傷，實力削弱；相反萊比錫並非恃才傲物，一班年輕小將對成功充滿飢渴，防守嚴密有紀律，搶拚兇狠，反擊亦快速，今仗受讓當然值得支持。