愛的替身？C朗新歡唇厚似伊蓮娜

猪拉多纳

皇馬球星C朗翻兜舊愛「伊蓮娜」！英國《太陽報》爆料，呢位葡萄牙國腳近日又有新女，係一位名為姬絲甸娜（Kristina Peric）嘅西班牙索模。呢位20歲靚女最特別之處，係同伊蓮娜8成相似，包括一樣有性感厚唇，難怪可以吸住C朗。

C朗早前「梅開二度」，被爆連環「食咗」前西班牙小姐德西蕾及意大利模特兒畢仙露之後，近日再建一功，同姬絲甸娜扯上關係。呢位來自西班牙塞維利亞嘅索模大方講述同C朗結識經過：「C朗嘅化妝師大衞見到我，就話我好似伊蓮娜，仲話一定要介紹我畀C朗識，佢肯定會鍾意我。」姬絲甸娜仲承認同C朗係情侶，但聚少離多：「C朗好忙，我亦經常要去邁阿密工作，不過一有時間，我就會立即飛返西班牙搵佢。」不過，姬絲甸娜可能只係「愛的替身」，C朗被發現近日又like番伊蓮娜IG啲相，唔通想翻撻？

C朗喺頒獎台亦有斬獲，獲西班牙《馬卡報》及意大利《米蘭體育報》讀者選為上屆歐聯最佳球員，佢攞獎時發表效忠宣言，話仲會留隊好多年。皇馬亦同中場卻奧斯續約6年，年薪達2,000萬歐元（約1.7億港元），令佢成為德國史上最高薪球員。
沙拉長抖 皇馬「大」件事

皇馬今晚西甲作客貝迪斯，皇馬後衞沙治奧拉莫斯早前踢太公波受傷，懷疑左膝內側副韌帶撕裂，即使用保守治療方法，至少都要抖兩個半月，如果進行手術，更加要休息3個月，即係「沙拉」要同2016年提早拜拜。所以教練施丹被迫安排比比同華拉尼出任中堅，以往佢哋同時上陣，表現麻麻，加上皇馬近期防線比較差，近4仗失6球，搞到4連和，寧捧中位數3.5球入球大。

（Now 632周日凌晨2時45分直播）