馮諾嘉手記：爆燈位靚 隨時突圍

魑魅魍魉

　　前日澳港盃抽籤儀式喺澳門賽馬會會所舉行，除咗香港馬會行政總裁應家柏同澳門馬會行政總裁李柱坤到場兼致詞外，當然唔少得一班練馬師、騎師同馬主撐場，大家除咗講吓自己馬匹嘅勝算同形勢外，最開心嘅係講到賽後有乜地方好去，晚飯去邊間地道美食餐館食餐勁，聽講有啲練馬師同馬主今次冇派馬遠征，都專登搭船過澳門湊吓熱鬧。

　　所謂友誼第一，比賽第二，以往澳港盃只係有轉播，香港馬會並冇受注，當然大大減低馬迷嘅興趣，甚至有馬迷話連應家柏都唔出席有關活動，今次可算係一反傳統，除咗澳港盃，又轉播多三場當地賽事，仲全部有得投注，馬迷亦樂在其中。

　　小妹之前曾經初步講過今屆澳港盃嘅形勢，港隊四匹參戰馬「創佳績」、「羅馬」、「尚兄」同「活力飛駒」，除咗後駒上場喺谷草1200米贏馬外，其餘三匹馬上場表現都唔算突出，幸而喺港澳盃一放到底爆出99倍大冷W嘅「爆料」，今次改為角逐主席挑戰盃，當堂少咗一大對手，而喺港澳盃跑第四嘅「黃金可愛」同第六名嘅「爆燈」，今場同樣有分角逐。

　　澳門賽事抽得靚檔好重要，排位一出，剛奪冠嘅「活力飛駒」竟然抽到大外檔，跑1500米夠唔夠長力都係其次，檔位差就已經大大減低勝算，港隊抽得最好檔位嘅係「創佳績」，評分亦係最高，算係四駒中最理想嘅。澳門代表「黃金可愛」排大外檔，「爆燈」就抽到黃金一檔，港澳盃嗰場後駒排大外檔，走外叠蝕位唔少，上場贏過佢嘅港隊馬，今次都冇出戰，相比之下今次對手較弱，隨時可以突圍而出。

澳門打吡吼沙煲兄弟

　　四場海外賽事設有過關，不妨畀多匹馬大家參考吓，就係角逐澳門打吡嘅「沙煲兄弟」，小妹雖然對澳門馬唔多熟悉，但聽騎練講，佢哋對呢匹馬好有信心。