錘仔般茅各有千秋和味濃

猪拉多纳

自從上季李斯特城創造神話之後，大家終於明白強隊並唔係大晒，唔敢再輕視弱隊。同時，李城神話亦都畀到希望一啲弱旅，令佢哋知道自己都有機會可以稱霸聯賽！所以，今季英超有好多球隊都非常豪氣，以破球會紀錄嘅轉會費羅致新兵。好似韋斯咸同般尼茅夫咁，兩隊都分別引入新球員，希望可以喺今季踢出奇迹！可惜「錘仔幫」新希望嘅加納國腳阿休開咧戰不幸重傷，預料將會缺陣四個月，大大減弱今場賽事嘅火藥味。雙方狀態及近況相似，今場五五波，預計兩隊打成平手，心水推介和局。

（Now 621及樂視周日晚11時直播）
韋斯咸首戰輸得唔抵

韋斯咸最近狀態認真麻麻，包括歐霸盃外圍賽同埋熱身賽，9戰只拎到2勝2和5負，合共失21球，防守問題嚴重。而且，佢哋喺英超開咧戰作客車路士時，除咗以1比2輸波之外，最慘就係輸埋人！球會早前以破紀錄2050萬鎊（約2億港元）轉會費，由史雲斯簽入26歲嘅加納國腳阿休上仗奮戰重傷，需要唞成四個月，對韋斯咸打擊相當大！再加上，上場球隊喺好多爭議聲之下輸波，成班「錘仔幫」都好唔憤氣，未免影響球隊士氣！事關原本已有一張黃牌喺身嘅迪亞高哥斯達，下半場粗野攔截韋斯咸門將，但球證冇判罰第二面黃牌，之後就比呢位野蠻球星喺89分鐘射入奠勝球做贏波功臣，搞到「錘仔幫」輸得好唔抵！

而且，韋斯咸最近賽程頻密，既要應付歐霸盃附加賽，又要出戰聯賽，大大消耗球隊體力。不過，今晚嚟到第二輪聯賽，韋斯咸將會喺新主場奧林匹克球場出戰般尼茅夫，話晒係新球場嘅第一場聯賽，相信一班「錘仔幫」一定會踢得特別醒神！而且，新主場可以容納8萬球迷，主場威力一定比上季更加厲害！佢哋喺歐霸盃第三圈外圍賽次回合時，就係第一次喺新主場出擊喇，當時仲全場爆滿，氣氛相當好！
般尼茅夫體能佔優

另邊廂，上季升班馬般尼茅夫以第16名完成英超首季之旅，順利護級，成績令人驚喜！球隊上季完成基本護級任務之後，今季目標當然係想更上一層樓，殺入前10喇！所以球會季前以破球會紀錄轉會費簽入20歲利物浦翼鋒佐敦伊比，成為球隊最大希望。今晚佢哋將會作客韋斯咸，主隊勝在有主場之利，客隊則以體能佔優，兩隊狀態不相伯仲，今仗和波味濃。