米蘭雙雄勢響頭炮

猪拉多纳

中資染紅意甲變天

中資進駐意甲，新一季米蘭雙雄變天！AC米蘭及國際米蘭喺季前獲中資財團入主，並雙雙換帥增兵，力爭打破祖雲達斯過去5季壟斷聯賽錦標局面。米蘭雙雄今晚首輪賽事分途出擊，AC米蘭主場對拖連奴（TVB 301周一凌晨零時直播），國際米蘭作客基爾禾，相信可以一齊打響頭炮。

（TVB 301周一凌晨2時45分直播）

中資財團中歐體育投資管理長興有限公司喺月初，正式以7.4億歐元（約65億港元）收購AC米蘭99.93%股份，標誌貝魯斯干尼主政AC米蘭30年嘅時代結束。「紅黑兵團」今夏亦動作多多，先聘請42歲少帥蒙迪拿執教，呢位前意大利著名射手崇尚進攻足球，可望為AC注入活力。
AC有朝氣 拖連奴冇運行

AC送走文尼斯、麥薩斯、奇雲保定等十幾位高薪冗員，僅簽入上季意乙神射手拿柏度拿、阿根廷中場荷西蘇沙、巴拉圭中堅古斯達禾高美斯，去蕪存菁儲定資金，隨時再作收購，球員同球迷對AC有憧憬，士氣都高啲。拖連奴今季聘請前AC主帥米赫洛域執教，呢位南斯拉夫名宿上季未完已經畀AC炒魷，領軍能力唔掂，最大鑊係拖連奴之前5次作客AC，得1和4負，睇怕米帥今次報仇無望。
迪保亞好腳頭 國米割「禾」

同市嘅國際米蘭畀中國蘇寧集團收購咗70%股份，準備大展拳腳，會方早前解僱教練文仙尼，改由荷蘭名宿法蘭迪保亞執教，佢首場領軍就喺國冠盃以2比0擊敗些路迪，終止之前4場熱身賽1和3負頹勢。以2,200萬歐元轉會費由拉素來投嘅意大利國腳簡達華亦有波入，可見今次換帥及簽人策略已初見成效，應該仲有一段蜜月期。同埋「藍黑兵團」近5次作客基爾禾贏咗4場，今仗3分可望手到拿來。