巴西飢渴大報復

猪拉多纳

贏德國即奪奧運首金

奧運男足夢幻決賽巴西男奧足對德國男奧足，兩年前世盃4強尼馬因傷缺陣，睇住巴西畀德國大炒七個一皮，今仗又喺地頭出擊，尼馬絕對唔想再有遺憾，佢近兩仗省入3粒狀態復甦，必全力助國家隊奪取首面奧運足球金牌。德國前鋒尼斯彼德臣同基拿比共轟入12球，有力破巴西清白之身，中位數2.5球，捧大。

（T804、myTV Super周日凌晨4時30分直播）

巴西首兩場分組賽打和0比0後，遭到輿論口誅筆伐，尼馬都被國民噓爆。「森巴兵團」知恥近乎勇，大炒丹麥4蛋後，愈戰愈勇，隊長尼馬已經喺8強及4強重拾射門鞋，上仗更加開波14秒就入波，幫巴西狂數洪都拉斯6比0，證明呢位巴塞球星已恢復最佳水準。

除咗尼馬，前鋒加比爾捷西斯同盧恩古靴美亦各有3球進帳，巴西火力全開，勒都勒唔住。呢支上屆銀牌得主從未贏過奧運足球金牌，今屆又打入決賽，仲有地利，相信會強攻對手把握機會創歷史。
季軍戰超霸鷹噬洪都拉斯

雖然德國男奧足冇球星孭飛，但有賓特兄弟、史浩克04中場麥斯美亞等德甲球員。球隊整體戰出色，踢法同大國腳捧2014年世盃一樣咁有侵略性，今屆5戰入21球，其中4場總入球達4球或以上。尼斯彼德臣同基拿比已各入6球，並列射手榜「一哥」，唔怕同巴西駁火。

季軍戰洪都拉斯男奧足對尼日利亞男奧足，洪軍上仗慘吞巴西6蛋，信心已盡毀，「超霸鷹」有非洲球員體力雄渾嘅優點，匆匆再戰有優勢，前鋒伊特保今屆亦已轟入4球，尼軍讓半一，要上盤。

（T804、myTV Super周日凌晨零時直播）