高清睇跑馬：偉龍寶尾唔怕追

魑魅魍魉

　　今場總場次518谷草四班1200米，「偉龍」之前兩戰全告大敗，今戰既要縮程1200米，也是跑谷戰，全場最冷絕不意外，不過表現一鳴驚人，擊敗新勝的「欖球樂園」。其實睇番亮相圈表現已有啟示，因為對上兩仗行圈扭計，情緒急躁，此戰卻收斂淡定，明顯很喜歡谷戰環境，至於陣上走勢更加搶鏡，挫下強手不在話下，全程蝕位極多，先係起步唔快，一出閘轉彎走五叠，接住對面全條直路走三叠，直路又外閃又內閃，走勢生硬，由此可知質素極高，繼續出戰四班必具優勢。

　　季內總場次519谷草三班1200米，「包裝猛將」上仗首次入位，雖然大有進步，但落後頭馬極多，加上今戰排十一檔起步，照計熱極有個譜，豈料臨場票如雨下，七倍打至四十一蚊開跑，結果不負所托，順利贏馬。重溫沿途走勢，牠出閘唔快，原先策略已留前鬥後，起步欠佳順勢留得更後，全程在尾二，轉彎中段開始發力，入到直路抄出五、六叠，一早望空之下，柏寶又騎又鞭衝刺如箭，儘管贏四分三位距離唔算遠，但勝在撻着後走勢勁如炮彈，亦因為穩操勝算，柏寶過終點前已經做出振臂揚威慶祝動作，擺明大把在手，留在三班何來對手。

Sam