數據人生：霍廐馬初戴鼻箍掂

魑魅魍魉

　　霍利時目前養馬近五十匹，加上旗下不缺質新分子，相信應無人擔心其續牌機會，但不知何解踏入2010年後，此廐手風極曳，自二月尾勝出「聖迪達」後，一直至剛戰方憑「偉感」重開勝門，但四個月才取得兩W，相信支持者必然不收貨。

　　不過，霍廐馬屢欠表現後，部分評分已減至有利水平，小心打破悶局後繼續反彈﹔至於新勝馬「偉感」雖然僅以短頭險勝「年年開心」，但不要忘記牠負一三三磅，對於這匹三歲馬而言，其實亦有相當難度。勝後加分回升至四班，負磅減輕之餘，現時四班賽事的水準，亦因部分超班馬升班後而變得較弱，預計此匹跟「勝眼光」、「新強勁」及「追月」等同父之馬，季內必續有頭馬見面，可長跟。

      另一點值得留意，就是近期霍廐馬初戴鼻箍表現不俗，日後如見此廐作相同配備變動時，記得多加留意。

歐陽志恆