李斯特城搶W省招牌

猪拉多纳

布魯士劈炮老虎謝晒

新一季英超今晚開鑼，揭幕戰上演「雙城記」，新升班球隊「老虎」侯城，主場對「狐狸」李斯特城！侯城未出閘，先爆內亂，領隊布魯士不滿球會孤寒，唔肯開水喉增兵，結果上月尾憤而辭職，會方仲未請到新帥，群龍無首，認真頭痕。李斯特城正好乘虛而入，贏番場漂亮勝仗，掃走近期頻頻失利嘅陰霾，捧客勝。

（Now 621、樂視周六晚7時30分直播）

侯城上季透過升班附加賽，搭上尾班車殺上英超，難得重返頂級聯賽，但老闆艾林竟然唔願意使錢增兵，以提升實力保住得來不易嘅英超席位，令到領隊布魯士非常不滿，乾脆劈炮唔撈。
侯城後防4將有傷

呢位曼聯名宿已執教侯城4年，全靠佢積極改革，球隊先至有今日嘅成績，布魯士突然走人，肯定嚴重打擊士氣，特別係一班由佢提攜出來嘅「子弟兵」，仲會唔會全力為「孤寒財主」賣命，實在令人懷疑。

侯城另一大不利因素係受傷兵問題困擾，正選門將麥基哥、3位後衞戴臣、阿歷斯布魯士、奧度巴祖有傷在身，好可能缺陣。另一位守將哈利馬古尼、前鋒馬隆尼亦因傷上陣成疑，看守領隊費蘭肯定好頭痕。

李斯特城季前熱身賽表現令人失望，以法定時間計算，國冠盃3戰僅1和2負，包括吞巴黎聖日耳門4蛋，上仗社區盾以1比2不敵曼聯，慶幸占美華迪有波入，證明腳風仍然順。其實「狐狸」之前對手皆為勁旅，加上季前狀態未操起，輸波情有可原，今仗對無帥兼殘陣嘅侯城，應該唔會再失拖，唯一隱憂係中堅賀夫今場停賽。李斯特城上季全靠踢出士氣，奇迹捧盃，領隊雲尼亞里深明箇中道理，勢必全力爭取打響頭炮，延續威勢。