爭次名！中國瑞典大格鬥

猪拉多纳

奧運女足明早上演E組第3輪激戰，由中國女足對瑞典女足。世界排名第六嘅瑞典上仗大敗予東道主巴西1比5，表現可謂慘不忍睹，另邊廂中國女足喺上輪贏波士氣大振，為爭次名出線資格繼續攻，入球大抵玩。

（周三早上9時開賽）
瑞典防線未執掂

瑞典遭巴西大炒令人意外，本身瑞典喺女足方面屬實力分子，上仗最大嘅問題係防守唔夠集中，即使世界級中堅菲絲查在陣，但畀巴西搓多兩腳就散晒，相信呢條豆腐防線短時間內都好難執番好。

反觀，「鏗鏘玫瑰」中國今屆表現予人好感，雖然首仗對巴西淨輸三球，但整體表現唔失禮，事關兩個失球都因為女神門將趙麗娜經驗不足，先後甩手同失位所致。好彩中國上場已經重拾正軌，輕取南非兩球，左腳強勁嘅古雅沙同「女版細哨」譚茹殷當弗，預料兩隊為爭出線會放膽搶攻，相信一場入球騷在所難免！