銀河艦隊搶W起航

猪拉多纳

西維爾遭「拆骨」人面全非

歐洲超級盃今晚喺中立場挪威舉行，連續3屆上演西甲鬥訌，由上屆歐聯冠軍皇家馬德里對歐霸盃盟主西維爾。「銀河艦隊」皇馬即使缺少養傷嘅C朗，但以佢哋國冠盃兩連勝走勢，加上賓施馬傷愈候命，更添爭勝本錢。反觀西維爾今夏慘遭「肢解」，教練艾美利及多位骨幹人物離隊，實力急降，受讓都冇着數，捧皇家馬德里1.77倍主勝。

（有線61、64、201及203台周三凌晨2時45分直播）
C朗巴利缺陣影響唔大

皇馬冇C朗，唔代表世界末日，最近2仗國冠盃就分別擊敗豪門車路士同拜仁慕尼黑。事實上，除咗2位葡萄牙國腳C朗同比比繼續抖之外，沙治奧拉莫斯、莫迪歷及馬些路等一眾主力早前已歸隊操練。協助威爾斯殺入歐國盃4強嘅加里夫巴利亦已報到，但今仗都唔會披甲，好在射手賓施馬傷愈可望上陣，加上由祖雲達斯回巢嘅前鋒艾華路莫拉達，皇馬人腳非常鼎盛。教練施丹可以盡情發揮佢嘅華麗進攻戰術，猛攻西維爾，務求為新球季壯行色。

西維爾今夏遭逢巨變，率領球隊實現歐霸盃3連冠嘅主帥艾美利畀巴黎聖日耳門挖角，上屆歐霸盃決賽轟入2球嘅隊長安度查轉投史浩克04，上季喺西甲轟入16球嘅加美路則加盟馬體會，仲有前鋒洛蘭迪、一對防中班尼加、基祖華克，甚至連一代名將雷恩斯都離隊他投，西維爾可謂人面全非，新教森柏奧利要執正隊波相信要一段日子，今仗對住如狼似虎嘅皇馬凶多吉少。
近5交鋒皇馬贏4次

事實上，西維爾過去兩屆踢歐超盃，都無功而還，包括2年前淨吞皇馬兩蛋。雙方近5次交鋒皇馬贏咗4次，最近1次係今年3月聯賽大炒4比0，以「銀河艦隊」目前強勢，遇上百廢待舉嘅西維爾，有力喺新球季先聲奪人。