尼馬冇貨交巴西悶和南非瘀爆

猪拉多纳

巴西男足想打破奧運「無金魔咒」又受挫折！呢支東道主昨晨喺A組由王牌尼馬領軍，兼全場爆滿7萬名球迷打氣下，對住下半場大部分時間10人應戰嘅南非，竟然連波都入唔到，仲畀南非反擊搞到一頭煙，最終打和0比0，認真羞家。
航空公司打救 超霸鷹抵埗贏波

巴西6月唔選尼馬踢美洲盃，就係希望佢留力專心為「森巴兵團」爭金牌，但可能呢位巴塞射手放假太耐，未操起狀態，今仗表現冇料到。巴西全場最具威脅射門，來自將轉投曼城嘅新星加比爾捷西斯，可惜佢射門中柱唔入。就算南非最後30分鐘打少1人，「森巴兵團」仍然未能攻破對手大門。巴西傳媒日前批評尼馬掛住同隊友開派對，絕對有道理。

B組尼日利亞疑受財政問題困擾幾乎飛唔到去巴西，滯留美國亞特蘭大，好彩當地航空公司肯幫手，借出一部將會接載美國男籃夢幻隊嘅專用航機，接送「超霸鷹」奧足大軍，經過6小時航程，及時抵達巴西瑪瑙斯，仲以5比4擊敗日本，問你服未。