巴塞開火攻城 美斯提早歸隊振軍心

猪拉多纳

國冠盃歐美賽區，另一支西甲豪門巴塞隆拿喺瑞典斯德哥爾摩，出戰英超盟主李斯特城。巴塞雖然缺少備戰奧運嘅尼馬，但美斯、蘇亞雷斯等主力已經歸隊，仍然夠殺。「狐狸」李城上仗慘吞巴黎聖日耳門4蛋，證明呢支「神奇球隊」級數同傳統勁旅仍有一大段距離，恐怕難以抵擋「地上最強」火力，捧巴塞隆拿讓球主勝。（有線61及201台周四凌晨2時直播）

美斯失意於美洲國家盃，但並冇影響佢為球會搏殺嘅鬥心，更加提早結束休假，返回巴塞集訓。呢份專業精神亦感染其他隊友，碧基、馬斯真蘭奴、布斯基斯都追隨「大佬」步伐提早歸隊。因此巴塞現時人腳士氣都極佳，上仗首度出擊即以3比1擊敗些路迪。
李斯特城面臨崩潰

此外巴塞近期頻頻掃走二線兵，就算阿達杜倫、沙治羅拔圖、阿歷斯維度等稍有名氣嘅球員，都有被清洗嘅危機，嚟緊踢熱身賽都要搏盡，博取教練安歷基信任。巴塞近8次硬撼英超球隊，錄得6勝1和1負佳績，數據亦佔優。

李斯特城上季英超全靠萬眾一心神奇封王，不過奇迹可一不可再，「狐狸」新季面臨嚴峻挑戰，特別係內部人心思變，先有防中尼高路簡迪轉投車路士，同時快翼馬列斯過檔阿仙奴嘅傳聞亦未停過，無論對實力及士氣均有影響，上仗國冠盃0比4輸畀聖日耳門，更係對「狐狸」踩多一腳，面對來勢洶洶嘅巴塞，更難招架。