紅軍腳軟唔夠羅馬砌

猪拉多纳

利物浦領隊高普變身「魔鬼教練」，今夏安排熱身賽一場接一場，繼尋日國冠盃硬撼AC米蘭之後，相隔唔夠48小時，聽朝又喺中立場美國聖路易斯布殊球場惡鬥羅馬，真係想收買人命咩。紅軍3日兩賽，未必回得切氣，羅馬以逸待勞有着數，捧客W。

（有線61、201台周二早上8時30分直播）
3日兩賽球員嗌攰

高普上季中途臨危受命執教利物浦，由於係收拾爛攤子，成績冇乜起色。因此，佢趁今個夏天實行個人大計，表明以高強度訓練催谷球員狀態，希望新季取得好開始。利物浦7月初開操後，已經踢咗6場熱身賽，近兩仗國冠盃更加先後鬥車路士同AC米蘭呢啲強隊，球員根本冇得偷懶。史杜列治、丹尼艾格斯等人都認今次季前操練令佢哋苦不堪言。雖然紅軍上仗憑奧歷治同羅拔圖法明奴入波，以2比0擊敗AC米蘭，但匆匆再戰，能否保持水準，實在令人懷疑。

羅馬對上1場熱身賽，已經係7月17號以3比2擊敗俄超泰歷克，球員叉足電兼餓波已久，相信會特別醒神。睇埋羅馬近兩次同利物浦踢熱身賽贏晒，有靚績支持，今場可以睇高一線。「雌狼」唯一不利消息係，新加盟嘅後衞馬里奧雷爾受傷面臨長抖，不過好彩佢唔係球隊主力，應該無礙球隊今場贏波而回。