利物浦半個主場勢劏車

猪拉多纳

謝拉特美國fans愛屋及烏

原定北京上演嘅「曼市打吡」踢唔成，不過另一場國冠盃「英超大戰」車路士鬥利物浦，聽朝就會喺洛杉磯爆發！兩大勁旅今次都強陣訪美，不過「紅軍」嘅備戰明顯比新埋班嘅車路士更充足，而且利物浦名將謝拉特喺洛杉磯踢波，相信當地唔少球迷都會愛屋及烏撐紅軍，今場捧利物浦Ｗ最明智！

（有線61及201台周四早上11時35分直播）

利物浦季前熱身非常順利，目前踢咗4場熱身賽全勝，而且一球波都冇失過，雖然話對手都係英國低組別球隊，但對於「紅軍」球員嚟講，連場勝仗正好係提升狀態同信心嘅最好方法。利物浦對今次美國之旅都好認真，上個星期已經飛到洛杉磯準備，相反車路士星期一先出發，適應上都輸蝕啦。
新兵韋拿杜姆試刀

「紅軍」目前有中堅祖爾麥迪比同中場盧卡斯受傷，不過新鮮加盟嘅荷蘭中場韋拿杜姆都有隨隊，有機會落場顯吓身手。利物浦傳奇謝拉特依家係洛杉磯銀河Icon，連帶當地唔少球迷都支持「紅軍」，今仗對住車路士喺聲勢上應該會佔優，一班球員自然踢得更加落力啦。
車路士殘陣準備差

車路士今季由干地接手，但呢位意大利籍主帥喺歐國盃後先至上任，依家仲係處於重建階段，首仗熱身賽更加輸畀維也納迅速，證明球隊仲要時間磨合。車仔新簽嘅法國中場尼高路簡迪仲未歸隊，後防伊雲洛域上仗友賽受傷，據報可能要抖3個星期，今仗「英超大戰」似乎冇運行。