曼城靚牌ShowHand拜仁

猪拉多纳

哥帥倒戈踩安聯場

足球世界充滿戲劇性，哥迪奧拿執教曼城第一擊熱身賽，今晚重返安聯球場，倒戈作客鬥前度球會拜仁慕尼黑！哥帥對拜仁實力固然瞭若指掌，最重要係曼城班底雄厚，即使缺少部分有份出戰國際賽嘅球員，但仲有耶耶托尼等猛將助陣，仍然夠殺。安察洛堤首次帶領拜仁慕尼黑主場出擊，但缺少多位國腳，而且連洛賓都傷埋，殘陣之下，恐怕招架唔住曼城，冷敲5.3倍客勝。

（now 632周四凌晨2時30分直播
拜仁過半主力放緊假

拜仁慕尼黑一向係德國隊骨幹，湯馬士梅拿、謝路美保定、曉姆斯、甘美治、紐亞，以及波蘭射手羅拔利雲度夫斯基、奧地利中場阿拉巴等主將，踢完歐國盃後仲放緊假，維達爾為智利捧完美洲盃，仍未歸隊。拜仁上仗熱身賽靠列貝利、洛賓、拿姆及一眾後備支撐大局，結果作客僅以4比3險勝德國第5級別球隊利普斯達特，仲有洛賓受傷，需要抖6至7星期，「肥安」都咪話唔驚，今仗隨時叫球員就住踢。

相比之下，哥迪奧拿手上副牌就靚好多，耶耶托尼、韋菲特邦尼、捷西斯拿華斯、費蘭甸奴、戴爾夫、拿斯尼、薩巴列達、高拉洛夫等常規球員都在陣，仲有鋒線新兵洛尼圖可候命，前中後3線人腳充裕，就算冇前鋒阿古路、中場奇雲迪布尼、門將赫特，哥帥都可以排出一個具級數陣容。
哥迪奧拿起清主隊底

此外，哥迪奧拿曾經帶領拜仁連奪3季德甲冠軍及兩奪德國盃冠軍，現時嘅拜仁由佢一手打造，有幾多斤両佢瞭如指掌，未踢已經先贏信心。哥帥為打響領軍頭炮，相信必定向球員「落柯打」搏盡爭勝顯身價。