馬主論戰

魑魅魍魉

鴻霸之星放到

　　今晚我哋隻「鴻霸之星」（圖）又上陣，呢隻馬上場響田草1200米跑第四，表現唔算太差，今次轉嚟谷草一哩試吓，過往曾經響同程贏過，路程肯定啱發揮，用楊明綸只負106磅，希望可以憑磅輕之利一放到底喇﹗

　　另外鍾意第二場「威威財星」，季初曾經響三班直路賽入Q，照計依家身處四班有一定着數，屢拼無功之後早排轉投方廐，操練工夫由頭做起，今次報跑曾經上名嘅谷草1000米，搵埋手風大順嘅韋達操刀，唔使講一定搏命。

（梁廷鏘）

鴻霸之星太陽昇執多W

　　勞愛德剛啱憑「雅雪」食尾胡，搏殺手風幾順，我睇好佢今晚繼續有馬贏，最啱心水係第五場「太陽昇」，上場響同程一放到底，表現相當搶眼，今次排六檔起步，以佢嘅前速應該可以一早切入，話唔定可以再次先過終點。

　　另外一匹心水馬係尾場「旺家多寶」，在港頭四場跑田草1400米全部三甲不入，上場轉跑谷草1650米即幾乎贏馬，只係以頸位輸畀「電子精英」，今次升上三班跑一樣冇有怕，係時候打開勝門。

（任達華）

馬之王謀交代

　　雖然谷草向來都係內檔馬較有優勢，但今次兩匹心水馬都排外檔，即管睇吓表現如何。先講第四場「福到多多」，唯一頭馬正係響谷草一哩取得，上場走去跑田草1800米，輸咗唔使太過失望，今次回師贏馬途程，用到柏寶操刀，就算排十一檔都有得揮。

　　另一匹心水係第六場「馬之王」，季內六戰獲四亞兩季，先後撼過「精彩生輝」、「盈彩繽紛」等強手，未出頭純粹欠運，今次吼準條件賽上陣，一心想謀交代，排外檔都有權贏。

（張敬山）