馮諾嘉手記：威海歡騰１放到底

港陌

　　響唔少運動項目，運動員或者教練都會因應不同形勢，施展唔同嘅策略，呢啲係一種智慧嘅表現。賽馬都係運動嘅一種，練馬師或騎師改變陣上策略而勝出比賽，內裏當然都有值得欣賞之處；不過，香港賽馬始終涉及數以億計嘅投注，策騎指示既然咁重要，係咪應該要提高透明度呢？呢點真係值得馬會諗諗。

　　聽晚谷草賽事，第五場四班1200米，小妹用「欖球樂園」做膽，早前跑過幾仗後，前仗改配韋達即響谷草1000米入Q，只係以四分三馬位輸畀頭馬「祥禎」，證明窄場性能出色；上場轉戰田草1000米，抽得有利外檔，結果以個多馬位輕取「領航人」開齋贏馬，反映四歲馬確係愈跑愈進步，今場回師谷草作賽，跑多二百米亦合發揮，連捷在望。

　　配腳方面，「鉅業光輝」連續兩仗有追勢，柏寶唔放手繼續騎，應該有計。「神力金剛」一再證明短優於長，近期集中跑1200米，話唔定會有突破。「太陽昇」新勝猶勇，換勞愛德操刀無損威力，要拖。「信賴」勝在夠忠心，有一檔之助都可以兼顧。

　　第六場三班1200米，小妹鍾意「威海歡騰」，近仗響沙田對住「盈彩繽紛」、「歡樂繽紛」等強手都跑近，證明七歲馬狀態仲喼到，今場轉嚟谷草上陣，對手實力大幅減弱，抽得黃金一檔隨時放到。

　　配腳方面，「超群財星」韋達連仗摸實，睇嚟唔出頭唔會心息，一定要吼實。「連利福星」、「馬之王」近仗表現唔錯，可一併兼顧，投注四連環拖埋強配柏寶嘅「包裝猛將」。