Ｃ朗回歸盡數愛沙尼亞

猪拉多纳

葡國總理探班大振軍心

葡萄牙出戰歐國盃前，今晚會喺最後一仗熱身賽主場鬥愛沙尼亞。葡萄牙近兩仗友賽先喺主場以3比0大炒挪威，之後雖然作客英格蘭輸0比1，但呢場波佢哋有超過半場時間少踢1人，奮戰至完場先失守可以話雖敗不辱。今晚葡萄牙有王牌C朗回歸助陣，肯定希望大勝一場振軍心，捧讓球主勝穩陣！

（TVB 301周四凌晨2時45分直播）

C朗拿度踢完歐聯決賽後，去咗度假叉電抖一抖，經過小休之後已於星期一歸隊復操，養精蓄銳迎接歐國盃決賽周。踢今場熱身賽之前，葡萄牙大軍仲獲總理安東尼奧哥斯達去訓練場探班，對球員嚟講絕對係一大鼓舞，今晚落到場梗係唔可以令國民失望啦！
終極熱身例炒對手

葡萄牙對上5屆參加歐國盃都可以順利喺分組賽晉級，似乎同佢哋入局夠快有直接關係，事關葡萄牙近年每逢參加歐國盃、世界盃等大賽，出戰決賽周前最後1仗友賽經常取得大捷，近8次大賽前嘅「最後熱身」，葡萄牙合共錄得7勝，而且全部至少贏2球或以上，根據往績，今仗有力炒起世界排名低一截嘅愛沙尼亞振軍心。