鬥牛兵夠本錢大勝

猪拉多纳

連奪兩屆歐國盃冠軍嘅西班牙今晚喺中立場瑞士聖加侖AFG球場，同波斯尼亞踢熱身賽。由於皇馬同馬體會今朝出戰歐聯決賽，兩隊國腳都無緣呢場比賽，但「鬥牛兵團」人才濟濟，特別係一眾邊緣國腳為爭上位，隨時更搏命。波斯尼亞無緣歐國盃決賽周，純粹陪太子讀書，戰意不足可能大敗，捧西班牙2.48倍讓球主勝。

（now 632周一凌晨零時直播）

西班牙領隊迪保斯基公布嘅初步名單有25人，換言之最後有兩人會被踢走，一班邊緣國腳更加要趁馬德里雙雄球員缺陣，以表現博取迪帥歡心，希望有得留隊。其中35歲前鋒阿度斯里今季大勇，為畢爾包轟入20個西甲入球，呢位射手大器晚成，難得有機會出戰大賽，絕對唔想最後關頭落選，今仗肯定使出渾身解數爭取入波。
波斯尼亞抖暑心態

類似情況仲有切爾達前鋒洛尼圖、維拉利爾中場般奴蘇利安奴、畢爾包後衞米基聖荷西，佢哋都係高質素二線兵，冇名氣支持，需要更落力交足功課，先至有機會保住國家隊位置，相信會全力以赴。另一邊廂，波斯尼亞兩位羅馬球星迪斯高及比真歷都有入選，但呢支巴爾幹球隊冇份出席決賽周，球員抱住等抖暑心態比賽，又點會搏命呢？雙方對上1次交手，波斯尼亞慘敗2比5，今仗難樂觀。