英格蘭軍備大晒冷

猪拉多纳

備戰歐國盃如火如荼嘅英格蘭，周五深夜會喺光明球場迎戰澳洲，今仗係領隊鶴臣決選23人名單前最後一場賽事，一眾星級國腳為免「臨尾Out」，肯定會把握機會博表現，尤其前鋒位置競爭激烈，朗尼、拉舒福特同史杜列治回歸令英格蘭火力大增，澳洲今仗試陣亦冇龜縮意思，開入球大機會濃。

（周六凌晨2時45分開賽）

英格蘭上仗殘陣友賽土其耳，仍憑哈利卡尼同占美華迪兩位神鋒入波贏2比1，雖然「華Dee」因為結婚而缺席今晚嘅賽事，不過鶴臣嘅選擇反而更多，事關因球會賽事而缺席上場波嘅「曼聯幫」同「利物浦幫」，已經全部歸隊備戰，中、前場嘅人才多到出唔晒，可以話係幸福嘅煩惱。
前線爭位踢鬥士哥

據報曼聯18歲前鋒拉舒福特將會作出國際賽首演，不過面對朗尼、哈利卡尼、占美華迪、史達寧等老大哥競爭，「福仔」唔想成為3個被踢走球員之一，今仗就要施展渾身解數，就算係師兄史杜列治同老大哥朗尼，都要為正選資格努力，隊內競爭會成為佢哋數胡嘅最大動力！
澳洲占美麥卡倫首秀

作客嘅澳洲今仗擺明試陣，領隊普斯迪高路徵召咗10個國際賽經驗7場或以下嘅新人，普帥賽前亦表明希望呢班未來棟樑可以冇包袱咁表現自己。今季喺布里斯班獅吼入20球嘅年輕射手占美麥卡倫，千呼萬喚下終於首度入選，今仗肯定會同拉舒福特駁火鬥騷Quali，士哥大戰一觸即發。