高清睇跑馬：滙名燈如虎添翼

纯情小彩迷

　　今季總場次454田草四班1600米，「鵬力洋洋」前速偏慢，但改配韋達即能跟在第五位，早段不用推騎亦主動跟前﹔大半程貼欄跟住「吉利多」，轉彎中段走出二叠方便搵位，然而入直路後一度被「順利多」及「確威星」阻了去路，幸好內檔有空位，韋達即從中突圍，可惜全程自領的「名人」佔步速之利，一步不蝕下險勝「鵬力洋洋」。

　　睇番直路走勢，發現韋達一鞭冇打，難怪賽後被問話，今戰人馬重來，表示幕後亦認同該戰的處理手法，既然「名人」再出再贏，足證賽事有水準，這次「鵬力洋洋」轉爭谷草對手大幅減弱，有力收服失地。

　　另外，今季總場次422田草三班1400米，「滙名燈」排十四檔，起步時杜利萊立即抽實並縮落包尾位置，轉彎時走出三叠蝕位不少，去到四百米再走出最外檔，更被跑跛腳的「太陽能」影響一度收慢，之後回氣再上衝勢仍勁，可惜落後太多及步速不快，縱使衝刺如箭也只得第三。不要忘記，該役乃「滙名燈」首次轉用後追跑法，但效果顯著，而殿軍「超勁精神」再出入Q，證明「滙名燈」居三班時刻具爭勝能力，回師一戰即勝的谷草1200米，喜排一檔如虎添翼。

Sam