高清睇跑馬：本地實力追得過

纯情小彩迷

　　今季總場次414田草五班1800米，「愛拼者贏」出閘反應不俗，但梁家偉想留後，多次看內側情況，企圖切入內檔搵遮擋，但未能成功而全程望空，大半程被「甜在心頭」及「彩旗飄飄」頂出第三叠，蝕位多已吃虧，尚要望空更難發揮，最弊第三段領放的「飛躍星河」減慢步速，不少馬匹開始踩油，甚至走出外叠，但梁家偉仍留住，雖處較前位置，卻失了先機，加上馬匹性能均速，入直路走出中外檔，未有拍住馬鬥衝，仍能保持速度跑第三，算有交代，周日強配柏寶，再跑上仗路程，係時候交代。

　　季內總場次423田草三班1600米，「本地實力」起步唔快，王志偉立即推騎，可惜反應平平，偉仔冇停手，騎到1200米處總算跟在中間偏後位置，入彎之後又力弱，騎者再推兩下，好彩馬匹反應不俗，大半程跟住「哈哈大少」，入直路一樣，起初一度被後駒封了去路，好在外面的「傳奇快車」向外斜跑，得以及早望空，但走勢未見出色，過了百五米，「金獅猛將」上前拍住衝，才展現強勁鬥心，愈追愈勁，僅以兩個半身位見負，殿軍「好芝味」再出補中，證明該役水準不俗，今次舊路重遊，易配楊明綸減多幾磅，追得過。

Sam