韋斯咸降魔冇阻力

猪拉多纳

曼聯爆兵變 齊反尹戈爾

英國《太陽報》爆料，曼聯上場英超吞熱刺3蛋後，球員喺更衣室質疑領隊尹戈爾換人決定，甚至有人當場話，點解會方仲未炒尹帥，可見球員對佢嘅不滿情緒已達臨界點，不惜公然反目。今晚英足盃8強重賽，曼聯作客韋斯咸，一眾紅魔隨時「玩嘢」，提早送尹戈爾一程，平手盤揀韋斯咸。

（樂視818周四凌晨2時直播）
朗尼復出狀態成疑

尹戈爾去留問題遲遲未有定案，成為曼聯一大不利因素，有傳中場卡域克對於會方議而不決，已經失去耐性想離隊。發生今次爆兵變，可想而知尹戈爾已眾叛親離，好難再有球員肯為佢賣命，今仗英足盃想過關，並唔樂觀。雖然朗尼日前已經喺Ｕ21復出，今仗有望披甲，但呢位隊長抖咗兩個月，恐怕狀態未足以應付激鬥，唔好對佢抱有太大期望。
水晶宮難嗒拖肥糖

相比之下，「錘仔」韋斯咸表現大勇，各項賽事保持10場不敗，包括上次作客同曼聯打和1比1，前鋒安祖卡路爾上仗鬥阿仙奴，更大演帽子戲法。賽前尹戈爾都話要特別提防卡路爾，但球員仲肯唔肯聽佢支笛，實屬疑問。韋斯咸好耐未有咁威過，難得今季踢出佳績，更加要好好把握機會，爭取再上一層樓。

另外，今晚仲有一場英超水晶宮主場對愛華頓，水晶宮上仗擊敗諾域治之後，已領先尾三新特蘭10分，護級壓力大減，加上近7場聯賽主場6敗，實在信唔過。「拖肥糖」前鋒盧卡古要爭神射手殊榮，仲要搏命，平手盤捧愛華頓。

（now 621周四凌晨3時直播）