馬體會精打細算

猪拉多纳

工廠仔首次喺《東方波經》同大家見面，希望幫到手。歐聯8強戰今晚強勢爆發，首回合賽事就嚟場「西甲內訌」，上屆冠軍巴塞隆拿主場惡鬥馬德里體育會。巴塞近年國內賽事剋住馬體會，但前屆歐聯8強就曾畀對手踢出局，馬體會兩大正選中堅亦傷愈復出，睇番佢哋近5次喺歐聯鬥西甲兵全開細，今場入球細係明智之選。

（有線61及201台周三凌晨2時45分直播）
馬體會大將復出助防務

馬體會自從由施蒙尼執教後，成功打造一條堪稱全歐洲最勁嘅「鐵血防守」，今季西甲31場只失15球，平均兩場波都失唔夠1球，賽前更收到好消息，兩大中堅高甸同史提芬沙域齊齊復出，令防線更加固若金湯。馬體會踢淘汰賽向來穩陣為先，喺16強連對燕豪芬都係兩場窿對窿，今次作客魯營肯定延續呢種少失波風格。
巴塞調整期唔敢冒進

巴塞隆拿經歷39場不敗後，啱啱喺「國家打吡」終於斷纜，主場1比2不敵皇馬，亦係「地上最強」連續第2場贏唔到波，連MSN都破天荒一齊交白卷，球員狀態似乎進入調整期，教練安歷基亦未必瘋狂搶攻，以免失作客入球，今場亦會踢得小心翼翼，入球唔慌多，1.78倍細盤抵玩。