愛華頓讓客降魔

猪拉多纳

作客特醒 造訪奧脫福有計

各位讀者您哋好！Yennie嚟緊會喺《東方波經》同大家一齊睇波。小妹最愛嘅英超進入直路階段，今晚曼聯主場對愛華頓非常好路，「紅魔鬼」近4場聯賽取得3勝，但依3場勝仗都只係淨勝對手1粒咁大把，攻力欠奉，相反愛華頓今季作客超醒神，受讓一球情況下，1.85倍嘅讓球客勝值得支持。

(now 621周日晚11時直播)

國際賽期前，曼聯憑住小將拉舒福特一箭定江山，以1比0小勝曼城，呢位18歲新星成為曼城打吡有史以嚟最後生嘅入波球員，認真威水！佢近8場已射入5球，表現相當穩定。未計昨晚賽果，曼聯現時只係落後排第4嘅曼城1分，爭入前四攞歐聯席位仲有價講，不過球隊鋒力始終唔夠，近6場比賽有4場只入得1球，2場交白卷。而且舒韋恩史迪加再次受傷，連同未好番嘅朗尼、菲爾鍾斯同艾舒利楊格今晚都會缺陣。
拖肥糖聯賽客戰只一敗

「拖肥糖」愛華頓今季非常「另類」，特點係「主弱客強」，佢哋今季主場成績15場拎16分排喺第17位，表現完全唔合格，近6場英超主場比賽只取得1勝，即使對住西布朗、史篤城及史雲斯等中下游球隊都贏唔到。相反，愛華頓喺13場作客賽事取得22分排第6位，今季聯賽作客只係輸過1場，表現絕對拍得住傳統勁旅。
盧卡古爭金靴抬身價

仲有呀，近日有傳愛華頓首席射手盧卡古好大機會下季離隊，如果傳聞屬實，「糖迷」都唔使擔心會影響佢表現，因為呢位近期演出媲美超級英雄嘅射手，喺射手榜暫時以1球落後比領先嘅哈利卡尼同占美華迪，為求抬高身價，相信佢一定全力以赴，爭取更多入球，今場到訪奧脫福相信至少可保不敗，1.85倍讓球客勝值得支持。