意大利受讓捧「德」過

猪拉多纳

近6次對壘保持不敗

另一場熱身賽戲碼亦相當強勁，由兩支歐洲勁旅互撼，德國主場迎戰意大利。話就話德國係世盃冠軍，不過佢哋踢熱身賽就一啲霸氣都冇，連埋上仗畀英格蘭絕殺，「日耳曼兵團」近6場熱身賽只係贏得1鋪咁大把，偏偏意大利近年對住德國未驚過，對上6次交手從未輸過畀德軍，呢鋪佢哋受讓梗係抵玩，2.1倍「讓客」唔好錯過。

（無綫翡翠台、TVB13周三凌晨2:45直播）

德國自從捧走大力神盃後Keep住漏氣，踢親太公波都揸流攤，6場波淨係贏得1鋪，堅肉酸。上仗鬥英格蘭更令捧場客失望，夠膽死領先2球都反輸3粒完場，睇得出班波幾有「鬥志」。
德國點兵缺競爭性

講真吖，領隊勒夫呢次點兵誠意欠奉，賀芬咸前鋒禾蘭、史特加中場迪達維、慕遜加柏中場史甸度、史浩克門將費文等今季有表現嘅新星一個都唔揀，偏偏選入普多斯基、馬里奧高美斯呢啲老將，搞到成隊波冇乜競爭，班球員完全冇危機感仲邊會同你搏命先？再加上中場根度簡、守將謝路美保定因傷落選，進一步打擊實力。

相反意大利人腳名氣雖然冇德國咁大，但踢起嚟就活力十足，上仗亦同另一勁旅西班牙鬥個不分高下，今仗再戰德國絕對有力一拚。值得留意嘅係，「藍衫軍」對住德國真係驚都未驚過，最近6次交鋒，意大利取得3勝3和不敗佳績，可以稱得上係德國剋星，今仗受讓仲點可以錯過吖！