巴西死火難贏巴拉圭

猪拉多纳

尼馬停賽往績輸蝕

世界盃外圍賽南美洲區聽朝上演連場惡戰，有王牌前鋒尼馬停賽嘅巴西將會作客巴拉圭，論名氣同國際賽成績，「足球王國」巴西梗係贏晒，不過巴西喺鄧加帶領下霸氣欠奉，過往出戰防守力強嘅巴拉圭都冇甜頭，近3次對賽都和波收場，今場作客都信唔過，巴拉圭主場受讓必捧1.7倍「讓球主勝」。

（開賽時間：周三早上8:45）
巴拉圭攻守兼備

今屆世盃外圍賽5仗拎到2勝2和1負嘅巴拉圭，係南美洲少有嘅防守型球隊，佢哋只係失過4粒，屬於失球最少隊伍之一，上年10月佢哋就曾經試過主場守和另一南美勁旅阿根廷0:0，可見呢班波嘅防線足以抵擋強攻猛打，更何況箭頭列斯卡奴上仗梅開二度，整體進攻亦見流暢，可謂攻守兼備，巴西想喺巴拉圭身上攞到入波絕對唔容易。
近3戰對賽和波收場

翻查數據，巴西近3次對住巴拉圭都贏唔到，包括近2屆美洲國家盃8強交手打和，「森巴兵團」2次都喺互射12碼被淘汰。最慘係巴西依家踢唔出霸氣，除咗尼馬叫做世界頂級之外，稱得上「世界級」嘅球員真係冇幾多個，最弊係連尼馬都因為累積黃牌夠數要坐波監，以巴西依家嘅鋒力，都好難撕破巴拉圭條防線囉。