恒大作客照轟FC悉尼

猪拉多纳

捧完中超盃乘勝追擊

今日亞冠盃焦點之戰，H組FC悉尼主場對FC廣州（廣州恒大淘寶），上屆冠軍FC廣州開局失利，首輪僅悶和浦項制鐵0比0，幸好呢支豪門及時回勇，剛於上周六奪得中超盃沖喜，主帥史高拉利揚言今仗必強攻，FC廣州客W1.73倍抵玩。

（now 670周三下午5時直播）

FC廣州首輪佔上風，未能攻破浦項制鐵大門的確可惜。好消息係呢支中超盟主上仗中超盃，以2比0擊敗中國足協盃得主FC江蘇，前鋒列卡度高拉特梅開二度，可見呢位上屆亞冠盃神射手已重拾射門觸覺，FC廣州今仗入波有保證。

教練史高拉利亦話，球隊踢完中超盃，狀態有明顯回升，首輪失分後，今仗更加關鍵，必須主動出擊爭勝先至有出線機會。由馬體會加盟嘅前鋒積臣馬天尼斯亦渴望開齋，今仗對態沉嘅FC悉尼，應該搵到食。
悉尼雙箭頭因傷缺陣

FC悉尼上輪亞冠盃吞浦和紅鑽兩蛋，近6仗聯賽亦未贏過，雙線夾擊下，喘不過氣。更唔好彩係一對前鋒保斯基、麥西蒙受傷，兩人今季合共為FC悉尼攻入8個聯賽入球，佔全隊近3分1，一齊缺陣對FC悉尼打擊有幾大可想而知，遇上來勢洶洶嘅FC廣州，只能束手就擒。