識玩巴省聯必捧山度士

猪拉多纳

巴省聯開咗兩輪，大家玩過未呢？唔知乜東東唔緊要，簡單話你知啦！巴甲開鑼前，唔同省都會有聯賽，依家受注呢個，就係聖保羅省嘅比賽，呢個省聯賽共有6個級別，依家呢個係最高級嘅，幾支大家都好熟悉嘅巴甲球隊聖保羅、山度士、彭美拉斯同哥連泰斯等都有份踢。
騎呢賽制懶人包

至於點踢呢？個賽制又好鬼過癮喎，分組賽20支球隊分4組，每組5隊，每支球隊就唔會同自己嗰組嘅對手踢，反而係同其餘3組所有球隊進行單循環對賽，總共要踢15場，小組前兩名進身8強淘汰圈，而總積分榜成績最差嗰6支球隊降班。
遇伊圖諾二度復仇

過往6年山度士都入到決賽，仲攞過4次冠軍，只有2013及2014年屈居亞軍，擺明對呢項錦標情有獨鍾。至於2014年決賽，就係輸畀今場對手伊圖諾，當時兩回合1比1，山度士射輸12碼飲恨。呢個仇山度士肯定銘記於心，上年再遇已經主場大炒伊圖諾3蛋，今場相信一樣唔會留手，誓要二度復仇，仲唔係大炒格？

（周六晚9時開賽）