車仔踩場追殺屈福特

猪拉多纳

希丁克冧掂群星搏老命

做領隊唔係叻就得，最緊要識搞關係同氹老闆！今晚英超車路士作客「大黃蜂」屈福特，車仔自老帥希丁克接手後未輸過，唔單止成功凝聚眾將肯為佢賣命，仲話歡迎老闆阿布拉莫域「巡視業務」，恩威並施助車仔重上正軌。適逢「大黃蜂」喺前線孖寶恩哈路同迪尼跌Watt而戰績下滑，有力反客為主，客W有計。

（now 621周四凌晨3時45分直播）

曾遊歷歐亞球圈嘅希丁克係老江湖，深明戰術高超或訓練方式都係其次，最緊要係球員肯為佢賣命；前任莫連奴鬧勻晒全隊搞到眾叛親離有辦你睇，因此佢中途接手後，經常同球員傾偈了解佢哋需要，用合適方法幫助佢哋走出谷底。季初冇晒料到嘅法比加斯重拾指揮官本色，迪亞高哥斯達近6戰入4粒，中場奧斯卡杜斯山度士上仗「戴帽」，低迷多時嘅王牌夏薩特上場英足盃亦打破入球荒，計埋「遙控」指揮贏新特蘭嗰場，希帥接手後錄得5勝4和未輸過，唔到你唔服。
阿布督操無任歡迎

希丁克本身同老闆阿布拉莫域老友鬼鬼，前幾周阿布係咁嚟訓練場探班，希帥不但話阿布冇作出任何干預，仲歡迎阿布多啲嚟巡視業務，擦到老闆對鞋「立立令」之餘，班球員訓練嗰陣亦唔敢偷懶，自己又唔使做醜人，呢招真係高。

屈福特於上年12月靠兩大前鋒恩哈路同迪尼不斷入波，取得3勝1和1負佳績，包括作客2比2打和車仔，恩哈路及領隊科里斯更榮膺12月英超最佳將帥。可惜呢對孖寶上月跌Watt，連盃賽兩人夾埋只入3粒，連帶亦拖累「大黃蜂」成績，其中4仗聯賽輸3仗，演出慘不忍睹。加上車仔明顯回勇，新兵柏圖有機會處子登場，仲唔趁機打落水狗咩？客W有1.8倍咪嫌少呀。