屈福特下盤捉天鵝

猪拉多纳

隊長落柯打要交貨

身為護級隊伍，最忌喺冇領頭人指引方向帶領隊波前進，偏偏史雲斯用咗成個月時間，都仲未搵到個正式領隊。更大鑊嘅係新帥未到，新兵未有，呢班波轉個頭竟然賣走主將舒維爾，對住有隊長落order要改善表現嘅屈福特，「天鵝」讓平半梗係博1.8倍下盤！

（now621台周二凌晨4:00直播）

史雲斯自從上年12月初辭退主帥蒙克後，委任阿倫居迪斯出任看守領隊一職。之不過居迪斯領軍認真麻麻，上任至今只曾帶領「天鵝」取得1場勝仗，擺明未夠料坐正。呢班波最近12場波只係贏得1鋪，踢到咁頹仲讓波邊撐得落先？
史雲斯賣主力舒維爾

原本冬季轉會窗係「天鵝」增補良機，盛傳佢哋睇中愛華頓前鋒賴史密夫，以解決隊波攻擊力為英超第2差嘅毛病。「拖肥糖」亦唔阻人離開，但據講賴史密夫寧願過檔去諾域治，都唔肯揀史雲斯，擺明對佢哋冇乜信心。

坦白講，買唔成人都算，點估到「天鵝」竟然將主力舒維爾直接賣畀護級對手紐卡素。須知呢位中場今季平均每場貢獻1.5個入球機會，呢勻就算史雲斯買到前鋒，都驚中場唔夠彈藥提供啦，更何況家吓仲係得個吉！咁搞法，想士氣唔沉落去都難咯，加埋守將基爾洛頓停賽，呢鋪點打低屈福特吖。
屈福特尼敦阿基復出

係，屈福特表現的確有所回落，近5仗只得1勝。但睇番佢哋對手包括車路士、曼城等勁旅，失分情有可原。更何況隊長迪尼喺上仗作客輸畀修咸頓0:2，賽後承認隊波做得未夠好，拍心口承諾今仗鬥史雲斯一定交出好表現，證明班波並冇洩氣。再者佢哋有左閘尼敦阿基復出，陣容更見完整，今晚有力喺愈踢愈頹嘅天鵝身上搶番分。