恒大搶攻阿爾阿里

猪拉多纳

豪門森巴兵 中東大鬥法

亞冠盃終於來到決賽，今晚上演首回合，阿聯酋球隊阿爾阿里主場迎戰中超勁旅FC廣州（廣州恒大淘寶）！今場堪稱「森巴嘉年華」，恒大由巴西名帥史高拉利領軍，麾下3大森巴球星荷西保連奴、艾傑臣、列卡度高拉特，大名如雷貫耳。阿爾阿里亦唔輸蝕，兩位巴西兵洛迪高利馬、艾華頓列比路亦卡士十足。他鄉遇故知，上陣對決特別興奮，一眾巴西兵勢必大鬥進攻絕技，入球大值得捧場。

（now 671周六晚11時45分直播）
洛迪高利馬入球機器

阿爾阿里能夠首次打入亞冠盃決賽絕非偶然，事關會方近年大灑金錢招攬高質素猛將，包括用700萬歐元簽入賓菲加射手洛迪高利馬。呢位32歲前鋒上季葡超轟入19球，佢加盟阿爾阿里後，上陣12場入14球，包括亞冠盃4強兩回合都有波入，效率驚人，肯定成為恒大心腹大患。至身價高達1,500萬歐元嘅中場艾華頓列比路入選過巴西國家隊，佢技術全面，勝任中場任何進攻位置。
高拉特射手榜一哥

值得一提，阿爾阿里仲有摩洛哥快翼艾薩迪，佢踢過利物浦及史篤城等英超球會，能力絕不簡單。阿爾阿里擁有呢個進攻鐵三角，入波並唔困難，尤其係首回合主場出擊，更加要把握地利盡量爭取入波奠定捧盃基礎。

2013年亞冠盃盟主FC廣州相隔兩年再次打入決賽，實力有幾強大不言而喻。前鋒列卡度高拉特今屆賽事已有8球進帳，位居射手榜一哥，教練史高拉利曾協助巴西捧走02年世界盃冠軍，大戰經驗遠在對手之上，今次作客都未驚過。由於阿爾阿里中後場多土炮，防線只屬亞洲二流級數，要守住恒大星級鋒將肯定唔易，因此今場入球大可投信心一注。