紐卡素當黑寧捧諾域治

猪拉多纳

包尾未開齋 告魯爾打柴

歐國盃外圍賽引發嘅「FIFA病毒」認真唔講得笑，唔少英超球星都中晒招，當中曼城係重災區，阿古路同大衞施華都打晒柴。紐卡素亦不能倖免，佢哋個首席門將告魯爾要提早「收咧」，對於呢支包艇球隊嚟講，可以話係雪上加霜！今晚「喜鵲」會喺主場硬撼諾域治，紐卡素今季英超仲未開齋，有地利都唔見得好好多，平手盤梗係捧諾域治啦！

（now621周日晚9:00直播）

紐卡素今季表現非常不濟，開季頭8戰都未打開勝利之門，排喺積分榜榜尾。而荷蘭國腳告魯爾仲要喺歐國盃分組賽對哈薩克一戰時整傷十字韌帶，要提早收咧，搞到紐卡素領隊麥卡倫方寸大亂。1位好嘅門將，能夠協助球隊由輸變和，由和變贏，冇咗告魯爾，「喜鵲」都咪話唔大鑊！
諾域治作客唔失禮

佢哋嘅2號門將卡爾達路早前已經因傷缺陣，領隊麥卡倫急急腳重召外借到卡維尼嘅門將活特文返嚟幫拖，預計紐卡素今晚要靠洛艾利洛把關，聽見都戥佢哋擔心。再睇埋紐卡素今季主場成績，4戰錄2和2負，今晚唔似會反彈。

另邊廂，雖然諾域治上輪聯賽以1:2輸畀李斯特城，但呢場只係佢哋近兩個月以嚟嘅首場敗仗。而且，佢哋作客表現其實唔錯，之前試過喺韋斯咸同利物浦身上搶到分，客場演出一啲都唔失禮。今晚呢隻「金絲雀」造訪頹爆「喜鵲」，攞晒3分都唔出奇。