恩高斯達特守「細」波夠硬淨

猪拉多纳

講德甲，大家嚟嚟去去都係提拜仁、多蒙特，實情今季有支德甲新丁都值得大家注意，就係恩高斯達特。呢支上季德乙冠軍喺今屆歷史性殺上德甲後，表現並唔失禮，尤其防守寧舍硬淨。今晚佢哋作客迎戰科隆，梗係繼續追1.63倍入球細。

（now670台、有線61及201周六凌晨2:30直播）

恩高斯達特喺04年先成立，前身分別係ESV恩高斯達特同MTV恩高斯達特，呢兩支均有超過90年歷史嘅球會於04年合併，成為家陣嘅恩高斯達特。呢支「新軍」其後由德國第4級聯賽組別打起，憑住將士用命，球隊只係用咗11年即亮相德甲，的確值得球迷畀掌聲佢哋。
科隆主場火力曳

大家咪以為人哋係德甲新丁就好易恰，事實上班波作客嗰陣，專心打防反往往搞到對手勁頭痕。3場聯賽作客全部以1:0砌低對手，高效之餘防守仲非常硬淨。難怪搵勻成個德甲，只係拜仁同多蒙特嘅失球數字少過佢哋。

對手科隆今季雖然3次主擊未輸過，不過夾埋入得4粒，火力未算突出，今次對住恩高斯達特嘅銅牆鐵壁未必佔到咩甜頭，細盤夠穩陣！