日耳曼軍團剷平蘇格蘭

猪拉多纳

輕取波蘭信心返晒嚟

「日耳曼軍團」強勢回歸！自從捧走世盃冠軍後Hea踢嘅德國，上場終於回復霸氣，主場以3:1打敗歐國盃外圍賽D組強敵波蘭，首次登上小組榜首。賽後一眾德兵信心大增，誓要再下一城，呢鋪「日耳曼軍團」作客要焗攻嘅蘇格蘭，有力再數一場，就算要讓對手一球，1.74倍上盤都唔驚開唔到。

（有線61及201、中央5台周二凌晨2:45直播）

德國自從上年捧走大力神盃後，成隊波明顯放鬆晒，結果佢哋喺歐國盃外圍賽D組，一路都畀波蘭騎住，直至上仗復勇輕取對手3:1後，先一嘗榜首滋味。賽後班波信心返晒嚟，連向來低調嘅奧斯爾，都話國家隊已經上晒力，指明蘇格蘭今仗冇機會阻止佢哋前進。另一中場卻奧斯更預言，上仗梅開二度嘅馬里奧葛斯，將會玩殘蘇軍防線咁話。
馬高列奧斯續缺陣

點解佢哋咁有信心？無他嘅，皆因對手蘇格蘭目前排緊D組第4位，落後「三哥」愛爾蘭1分，為咗爭奪附加賽席位，佢哋今仗別無選擇，只可以焗攻冇得縮埋泊大巴。以羅素馬田等傳統英式後衞嘅蘇軍防線，呢次仲要谷前搶分，就算德國有翼鋒馬高列奧斯因傷退隊，領隊勒夫都話唔驚球隊搵唔到空位開火。齋靠靈活快速嘅馬里奧葛斯掛帥，都足夠將對手玩到陀陀擰啦。
蘇格蘭跌落第4焗攻

蘇格蘭搞到今時今日咁嘅地步，只可以怪自己攞嚟衰。鬼叫班波上仗竟然作客以0:1敗走格魯吉亞，全失3分直接將出線主導權讓咗畀愛爾蘭。搞到領隊史特根上場賽後怒批全隊表現唔合格，喪插佢哋無論傳送定作戰心態未如理想。想班波喺短時間內收拾好心情，頂住來勢洶洶嘅日耳曼軍團，講出嚟都冇人會信囉。